Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Kāinga whakaterenga

Tirohia mā te reo: Māori | Ingarihi

Te Ika-a-Māui

Ko te moemoeā a Māui, he haere ki te hī ika i te taha o ana tuākana.

I te wā ka hoki mai ai ōna tuākana mai i te hī ika, kua pātai atu a Māui, "E pai ana taku haere atu ki te hī ika i tō koutou taha?"

Heoi anō, ka puta tonu ngā kōrero ārai a ōna tuākana, "Kāo, he tamariki rawa koe ki te haere atu ki te hī ika. Ki te haere mai koe, kua kore he wāhi mō ā mātau ika maha, ka mau i a mātau."

Te Ika-a-Māui

"He iti noa te wāhi ki au, e kore au e pōrearea, pono tonu e hoa mā," ka tautohetohe tonu a Māui.

Ka whakautu te mātāmua, "Nā tō whīrokitanga, kei mea mātau he mōunu kē koe, kua whiua atu koe ki rahaki, hei kai mā ngā ika."

Ka kata ngā mea whakarongo.

Ka pukuriri a Māui. "E! Māku rātau e whakaatu, he tohunga tonu au ki te hī ika," te kī a Māui.

Ka whakaaro ake a Māui mō āna mahi, kia kite mai ana tuākana mō ana mahi hī ika. I tētahi pō, i a Māui e noho ana ko tāna kotahi, ka tīmata tana hanga i tētahi aho kaha ki te harakeke. I a ia e whiri ana, ka puta tana karakia, kia kaha ai tana aho hī ika. I te otinga o tenei mahi, ka tikina atu e Māui te kauae o tōna tipuna o Murirangawhenua, ka takaia ki tana aho.

I te ata pō o taua rā, ka haria e Māui tana aho, ka huna ia i roto i te waka o ōna tuākana. Te whakarewatanga o ngā tuākana o Māui i tō rātau waka, ka rongo rātau i te rerekētanga.

"Te taumaha o te waka i tēnei rā, kei te āwhina anō koe?" te kī a tētahi.

"Te āhua nei kua rahi ngā kūmara māu!" te kī a tētahi kē.

"Kāti te kōhete e hoa mā, mahia te mahi!" te kī a tō rātau tuakana.

Kāore a Māui i kitea e ōna tuākana, e huna ana i roto i te waka. I te rongohanga o Māui i te takahanga o te aho o te waka, mōhio tonu a ia kua tawhiti rawa rātau ki te hoki atu. Ka puea ake ai a Māui, mai i tana wāhi huna.

"E kare! E aha ana koe i konei!"

"Nāu mātau i tinihanga! Koinā rā te take kāore anō kia mau i a mātau ngā ika!"

Pukuriri ana ngā tuākana ki a Māui. Ka kōrero atu a Māui, "I haere mai au i runga i tēnei haere, i runga i te kī a Murirangawhenua, he tohunga hī ika ahau. Tukuna atu ō koutou aho, i a au e mahi ana i taku karakia, ka maha tonu ngā ika ka mau i a koutou." Ka tīmata te karakia a Māui.

Hoki ake ki runga

Ka tukuna atu ngā aho, kāore noa i roa, ka mau i a rātau he ika. Ka tīmata tā rātau hao mai i ngā ika. Kāore i roa e kī ana tā rātau waka i te ika, ā, e harakoa ana ngā tuākana mō ā rātau ika.

"Ko mātau ngā toa o ngā toa, ki te hī ika!" Ka whakamihi ngā tuākana ki a rātau anō.

Ka kī a Māui, "Nāku rā te wā ki te hī i nāianei."

Ka kataina ia e ōna tuākana, i a ia e kukume mai ana i tana aho hī ika.

"E! Kei waimaria rā koe ki te hopu karengo me tō aho! He maramara rākau kē pea, hei tere atu i a koe ki te kāinga!"

Pakaru mai ana te kata o ōna tuākana. Kāore noa iho a Māui i aro atu, ka rere tana karakia, ka whakarerihia tana aho.

"Ka taea anō e koutou te homai mōunu mō taku matau?" te pātai a Māui ki ōna tuākana.

Ka kaha ake te katakata mai o ana tuākana. Ka kukua tana ringa, ka mekea e ia tōna ake ihu. Ka maringi mai ngā toto o tana ihu, ka takaia tana matau. Ka tū atu a ia ki mua tonu o te waka, ka piua tana aho, me te rere o tana karakia. Ka whiua atu e ia tana aho ki te moana, kātahi ka tau, ka totohu ki te papa tonu o te moana, ki te ninihitanga o Tangaroa, kāore i roa ka mau atu te matau.

Ka mārō haere te aho a Māui, ka mutu te kata a ōna tuākana, me te pupuri anō ki ngā taha o te waka, i a rātau e tere ana i te moana.

"Kūtia te aho," te tīwaha atu o tētahi o ōna tuākana, me tana wiriwiri anō.

"Kai toremi tātau," te kī a tētahi, "tēnā koa kūtia tō aho e Māui!"

Ēngari mō tēnā, ka mau pū a Māui ki tana aho, kātahi ka tīmata tana hiki ake i te ika rā ki runga. Kua putu mai ngā tuākana rā i te waka, e wiriwiri ana i te mataku. He teitei ake te ika rā i tō rātau waka.

"Koinei rā te ika i kīia ai e tō tātau kuia e Murirangawhenua, ka whakawhiwhia mai ki a tātau," te kī a Māui. "Tautikangia tō tātau ika, kia tīkina atu tō tātau iwi."

Ka whakaae katoa ngā tuākana ki te noho mai, ka hoki atu a Māui ki Hawaiki. Te ngarohanga a Māui, ka tīmata ngā tuākana ki te haehae, ki te tapahi haere i te ika nui rā, e tangotango ana i ngā wāhanga rā mā rātau ake.

Te hokinga atu a Māui, e whakamīharo ana tōna iwi ki te kite atu i te ika nui rā.

"Ko Māui te tino tangata mō te hī ika," tā rātau kī.

E tapahi tonu ana ngā tuākana rā i te ika, ka kitea atu rā e te iwi, ka kitea tonu tō rātau momo. Nā runga i te matapiko, arā noa atu ngā puke, ngā maunga i oti i a rātau te haehae, mai i te tinana o te ika.

Pau noa ngā rau tau, ngā mano tau hoki, ka noho ko ēnei puke, ko ēnei maunga te takotoranga tūturu o Aotearoa, ā, e mōhiotia ana i nāianei. Ko ngā manu, ngā whakatipu, me ngā iwi o Hawaiki, i noho i runga i te ika nui a Māui. Puta noa ngā tau, ka noho ko tēnei Te Ika-a-Māui, ko te waka tonu a Māui, Te Waipounamu.

Koia nei te pūrākau mō Māui me te ika nui.

Hoki ake ki runga



Footer: