Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Kāinga whakaterenga

Tirohia mā te reo: Māori | Ingarihi

Hinewhaitiri

He rawe ki a Hinewhaitiri te tākaro me ngā tamariki kapua, uira, hau me ngā tamariki whatitiri hoki. He pārekareka ki a rātau, he karore ngā mahi, kua takahuri haere i te rangi, me ā rātau taumarumaru anō e whai ana i a rātau. He rawe hoki ki a Hinewhaitiri te rērere haere me ngā tamariki o ngā huarere, he kanikani, he whaiwhai haere, he tākaro hoki ngā mahi, ā, ko ngā pūrākau e rere haere ana e pā ana ki te hui marangai.

I te nuinga o te wā, ka tū te hui marangai i te wā o te ngahuru, ki tētahi whārua iti nei i tērā taha o ngā pae maunga, e wāwāhi ana i a rātau kāinga i te moana. Ka rongo katoa a Hinewhaitiri mō tēnei hui whakahirahira, engari kāore anō a ia kia tae ki tētahi o ngā hui nei. I ētahi wā o ngā marama o te ngahuru, kua huri te hau, kua pupuhi mai ko tētahi hau mai i te moana, koinei hoki ngā wā pai hei pupuri i te hui marangai.

Ko te mate, ki a Hinewhaitiri, me ōna hoa, kāore e tino mōhiotia te tino wā o te hui nei. Engari ki te rangonahia ngā whatitiri e rua e papaki mai ana, kua mōhio te katoa kua tae ki te wā o te hui marangai.

Nā tēnei hui, ka āhei ngā tamariki o ngā huarere ki te whakamātautau haere i a rātau pūmanawa. Mēnā koia te whatitiri tino hoihoi, te uira tino muramura, te hau tino pupuhi, te ua tino marangai, kāore he aha.

Mēnā kāore koe i tae ki te hui, kaitoa, kāore te hunga e tatari ana, kāore hoki he aha ki a rātau mēnā i tae koe, kāore rānei.

I te wā e takaporepore haere ana a Hinewhaitiri me ōna hoa, ka rongo rātau i ngā papakitanga e rua o te whatitiri. Ka tū rātau ki reira, ahakoa e pupuhi kau ana ngā tamariki hau i a rātau. Ka puta ake anō ngā papakitanga whatitiri rā ki te rangi, e tuku pōhiri ana, kua tīmata te hui marangai.

Ka peke katoa rātau, ka koemi ake i ngā pupuritanga o ngā tamariki hau, ka huri whakatemauī, kātahi ka huri anō te hau, ki te hau e pupuhi ana ki ngā pae maunga.

I tō rātau taenga ake, kua tīmata kē te hui. Ka tau ngā uira ki te whenua, ka wera, ka tahuna hoki ngā rākau. Me te papā hoki o te whatitiri, e rū ana i ngā whare, ka pore ngā rākau i ngā hau, ka waipukehia ngā awa, me ngā whare, kua mate ngā tāngata ki te haere ki ngā wāhi mārakerake.

I a Hinewhaitiri e tatari ana i te rārangi, ki te whakamenemene i ōna pūmanawa whatitiri, ka tiro whakararo ia, ki te hunga tangata e tūpono ana ki ngā wāhi haumaru. Kua pore kē ngā rakau, kua wera, kātahi ka tineia e te ua marangai. Kua wāhia kēhia ngā tahataha o ngā awa, kua hūtia kēhia ngā tuanui o ngā whare. Ko te āhua nei, kāore he mea i whakarerea, ka tanuku tonu ahakoa he aha.

Ka noho manawarau hoki a Hinewhaitiri, i te taenga ki te wā mōna ki te whakamenemene i ōna pūmanawa. I te whakaaro tonu a ia, mō te hunga tangata e pokea nei, ka papakihia e ia ōna ringa, mea rawa ake, he māmā noa iho te puta o te whatitiri rā. Ka kata katoa te whakaminenga, nā te kaha, ka whakamutua te hui i reira tonu. Kua mate kē te whakaminenga ki te kata, ki te pupuri hoki i a rātau rara.

Ka totohu te mahunga o Hinewhaitiri, i te whakamā. Ko tōna whānau whatitiri tonu ētahi o rātau e katakata ana ki a ia, kāore a ia e pīrangitia e ōna hoa uira, ā, ngarongaro ana ōna hoa kapua ki te rangi.

Ka noho a Hinewhaitiri ki runga i te maunga rā, ka hokihoki haere te hunga huarere. Ka tangi a Hinewhaitiri. I a ia e tangi ana, ka kite a Hinewhaitiri i ngā tāngata o te whārua, e putaputa haere ana i a rātau kāinga, ka tīmata rātau ki te whakapaipai haere i a rātau kāinga.

Ka pouri a Hinewhaitiri mō rātau, ka warewarehia tōna whakamā. Ka heke ia i te maunga rā, ka haere atu i te pā rā.

Ka omaoma ngā tāngata i a Hinewhaitiri, i tā rātau kitenga i a ia. Kāore a Hinewhaitiri i aro ake, ka noho a ia ki te whakapaipai haere i ngā rākau, te whakatere i ngā katinga o ngā awa me ōna ringa kaha. I te kitenga o ngā tāngata i a ia e mahi ana, ka whakamihi rātau ki a ia.

"Koinei te āhua ia tau, ia tau," te kī a te rangatira o te pā, " Kua marangai, kua tanuku ngā mea katoa, kua noho mātau ki te whakapaipai haere, kua haere mai anō te marangai!"

Ka tiro haere a Hinewhaitiri, ka mārama a ia ki ngā kōrero a ngā tangata rā, a tēnei ngahuru kua tū anō te hui marangai.

"Kua mate tātau ki te whakawhānui i ngā awa, te whakatipu i ētahi rākau anō, me te whakakaha haere i ngā whare, i mua i te taenga mai o ngā hau o te moana."

Ka noho a Hinewhaitiri ki te pā mō ngā rā maha, he āwhina i ngā tāngata ōna mahi. Ka hoki anō a ia ki te maunga i ngā pō, he pai ake ngā hau o konei.

I tētahi pō i te wā e moe ana a Hinewhaitiri, ka rongo a ia i tētahi reo, he reo mārū, nā tēnei reo i ruirui mai i a ia i tōna wāhi moe.

"Kua hia mano tau kē au e tū ana ki konei, mai i te wā o Māui me ōna tuākana." Ka tirotiro haere a Hinewhaitiri, kāore he mea i kitea.

Hoki ake ki runga

"Ko wai tēnā, ko wai koe?" tōna kī.

"Ko au te Maunga Koroheke", te kī mai o te reo. "Ko taku mahi he mātakitaki i a koe me ngā tāngata o raro. Me whakamihi au ki a koe mō ō mahi. Engari, kei te whakapōrearea noa iho koe. I te wā ka pupuhi tērā o ngā hau, kua tū anō he hui marangai, kua waipuke anō ngā awa, kua pūhia katoatia ngā rākau, kua turakina ngā whare, kāore he kiko o ā koutou mahi."

"Engari kua whakawhānuitia e mātau ngā awa, kua whakapakaritia e mātau ngā whare, ā, kua whakatipungia anō he rākau."

"Mā ēnei tū āhuatanga e āwhina i a koe, engari ka hoki anō ki taua āhua rā."

"Anā, me aha hoki tātau?" te pātai o Hinewhaitiri.

"Haria mai te hui ki konei. Māku ngā tamariki e whakamātautau."

Pau ana ērā rā mahi ki te pā, ka whakawhānuitia ngā awa, ka whakatipungia anō he rākau, i whakakahangia ngā whare. I te wā e whakakaha ana a Hinewhaitiri i tētahi taiepa, ka karanga ake tētahi o ngā tāngata o te pā, ka tiro katoa te whakaminenga ki te moana. Ka pupuhi mai tētahi hau, e anga tonu ana ki ngā pae maunga.

Ka tere atu a Hinewhaitiri ki te maunga, ka tūwhera e ia ōna ringa, ka papaki rua, i ōna ringa whatitiri. Mai i te paerangi, ka kite a ia i a rātau e tere mai ana ki a ia, ngā kapua, ngā hau, ngā whatitiri, me ngā uira hoki, e tiro ana ko wai ka tae tuatahi mai.

I mua i tō rātau taenga ake, ka papaki kaha a Hinewhaitiri, ka tū māro rātau katoa i mua i tōna aroaro.

"Kāti!" te tioro o Hinewhaitiri, "Kei kōrā kē tō tātau hui e whakahaerengia ana, kua roa kē te whārua e noho ana hei atāmira mō tātau, kua tae ki te wā me haere tātau ki wāhi kē."

"Ā, ki hea hoki tātau haere ai?" Te pātai teka a tētahi uira.

Kātahi ka pohū ake te reo o Maunga Koroheke, "Māku koutou e whakamātautau, māku koutou e whakawā hoki. Nā, tēnā whakaatunga mai ō koutou mahi i nāianei, i mua i te huringa o te hau!"

Ka whakaae katoa te whakaminenga, ka rārangi mai rātau i mua o Maunga Koroheke, kia tīmata ai te hui. Heke ana te ua, papā ana te whatitiri, hikohiko ana te uira ki ngā pari tahataha o Maunga Koroheke, me ngā awa hoki e waipuke ana.

I ō rātau kāinga mahana ngā tāngata e mātakitaki mai ana. Ka kī ngā awa, engari nā te whānui o ngā awa, kāore i waipuke. Ka pupuhi te hau, engari nā te tawhiti, kāore he mea i turakina. Mīharo ana ngā mahi a te uira me te whatitiri.

I te mutunga o te hui, ka pakipaki ngā tāngata o te pā, mīharo ana rātau ki ngā mahi o ngā tamariki huarere. Me te harakoa anō hoki o ngā tamariki huarere. Ki ō rātau nei whakaaro koinei tētahi o ngā hui tino whakahirahira. Ka whakahōnoretia a Hinewhaitiri, nāna hoki te whakaaro. Kāore ia e whakatakēngia anō.

Ka pakaru mai tēnā kata mai i a Maunga Koroheke, i rawe katoa ki a ia. "Anō nei he mirimiringa no te rā i te wā raumati", tōna kī.

Ko Hinewhaitiri hoki te whetū o te rā, ā, e noho haumaru ana hoki te pā o te hunga tangata.

Ki tēnei rā ki te tiro koe ki ngā pae maunga, ka kite koe i ngā kapua, e huihui mai ana i aua maunga, e tatari ana kia huri te hau, kia tīmata anō te hui marangai.

Hoki ake ki runga



Footer: