Te Wherowhero or Potatau, the principal chief of all Waikato [1844]

Nā George French Angas tēnei pikitia i waituhi

Kei te Whare Pukapuka a Alexander Turnbull Library

Ko Te Wherowhero tēnei, te tino rangatira o Ngāti Mahuta, he hapū nō Waikato. Ko tētehi atu ingoa māna ko Potatau. Ko te tikanga o tēnei o tana ingoa mō tōna kaha ki te patu tangata.

I hau te rongo o tēnei rangatira hei tino toa ki te whawhai me te whai utu i ngā iwi i hara atu ki a Waikato. Ko tōna matua ko Te Rāuangaanga nāna a Pikauterangi me āna tāngata i whakahinga i te pakanga o Hingakaka (ca 1780). I kīia ake nei, ko te wā tēnei i whānau ai a Te Rauparaha. Nō muri iho ka whawhai a Te Wherowhero me ngā iwi o Waikato i a Ngāti Toa. Ko Te Kakara (ca 1821) tēnei. Ka hinga a Ngāti Toa me ōna hapū karangaranga i konei. Nō konei ka whakarerea e Ngāti Toa i tō rātou whenua tupu, ka taki haere ki Taranaki. Heoi, ka whai a Te Wherowhero me Waikato i a Te Rauparaha mā, ka pakanga. Ko Motunui tērā (ca 1820). Ko te utu tēnei mō Te Kakara, te hinganga nei a Te Wherowhero mā i a Ngāti Toa me Te Āti Awa hoki.

Nō te hokinga mai a Tamihana Te Rauparaha i Ingarangi ka whakatakoto te kaupapa kia whakatū tētehi rangatira hei Kīngi mō ngā iwi Māori. Nā Tamihana rāua ko tōna karangarua, ko Matene Te Whiwhi, i kawe te kaupapa nei i te motu, a, ka roa ka whakawahia a Potatau Te Wherowhero hei kīngi Māori tuatahi.

Kei Ngā Tāngata Taumata Rau te roanga atu o ngā kōrero mōna.