Tāwhirimātea
Noho ai a Tāwhirimātea i roto i te tauawhitanga o ana pakeke a Ranginui rāua ko Papatūānuku, ā, kua roa kē te whānau e noho pērā ana. He rawe ki a ia te noho piri ki ana pakeke. Ka taea tana kōrero ki tana whaea, me te tohutohu i tana matua i ngā wā e pīrangihia ana. Kāre he aha ki a Tāwhirimātea, ngā uauatanga o te noho pō i ngā wā katoa me te kōpātanga hoki, kua mate kē a ia me ōna tuākana ki te ngōki haere. Kua eke kē ngā wera o ana tuākana.
Ka karangahia he hui, ka whakataungia e te nuinga o ngā tamariki, kia wehea ō rātau pakeke.
Ka kī a Tūmatauenga, "Ki te rongo rāua i te rau o taku patu, kātahi rā ka maunu mai rāua, kua pai tō tātau hikoi i raro i te maru o Tamanuiterā."
Ka whakahē tonu a Tāwhirimātea, me tana tīwaha atu i tōna āpitihanga, kia rongohia e te katoa, "Ko wai koutou! Ko wai koutou ki te whakamamae i ō tātau pakeke? Nā rāua tātau i whāngai, i poipoi, i whakatipu hoki, ka huri atu koutou ka pēnei atu ki a rāua?" Whakatakariri ana a ia.
Kātahi ka tuohu ngā māhunga o ngā tamariki i runga i te whakamā, heoi anō, ka totohe tonu a Tūmatauenga.
"Kua whiua kēhia te pātai ki a rāua kia wehe, kua patipati atu tātau ki a rāua, kia pai ai te kite i te ao mārama, me te kore anō e aro mai? E kāo! Kotahi noa iho te huarahi hei whai!"
Ka ara ake tana patu ki te hahau i ana pakeke, tere tonu a Tāwhirimātea ki te kuru i a ia, ā, e nōnoke ana rāua i roto i te pōuritanga, mea rawa ake ka umere atu a Tāne Mahuta ki a rāua kia turituri, kia āta tau.
"Kāti! Ehara tēnā i te whakautu, kua whakaae katoa tātau, kāre tātau e taea te noho pēnei. Māku e whakamātau ki te wehe i a rāua mā te pēhitanga o aku ringa."
Ka whakaae atu rātau, heoi ka noho tonu a Tāwhirimātea ki te taha whakahē, kāre ia i tautoko i runga i tāna i tūpono ai.
I te tuatahi ka pēhia e Tāne Mahuta ana waewae ki runga i a Papatūānuku, ka pana i a Ranginui mā ōna ringaringa. Ka whakapaungia ana kaha katoa ki tēnei mahi, e kore hoki e taea te wehe i ana pakeke.
"Kāore e taea e koe," te kī a Tāwhirimātea. "Whakamutua, e tika ana, kia noho piri rāua!"
Heoi anō, kāore anō kia mutu a Tāne Mahuta, ka takoto i runga i tana tuara, ka hikina ana waewae ki tana uma, ka tīmata tana pēhi mai i raro. Ka pēhi ia, kāore i aha. Ka pēhi anō a ia me āna kaha katoa, kāore tonu i aha. Ka hēhē a ia, ka pēhi anō. Ka tukuna e ia tana hā, ka pēhi anō, ka puta he kaha e whakawiri ana i tana tinana. Mea rawa ake ka tīmata te nekeneke, te nukunuku.
Ka puta te wehi a Tāwhirimātea, "Kāo!"
I tōmuri rawa ia. Kua wehea kēhia a Ranginui rāua ko Papatūānuku, ka puta ake rātau ki te ao mārama. Ka noho ngā tama a Rangi i runga i te ohorere, i runga hoki i te wahangū, me te kaupare i ō rātau kanohi i te māramatanga o Tamanuiterā, e pōkia nei rātau e tōna mahana.
Ko Tāwhirimātea te tuatahi ki te peke ake. Ka wepua e ia ana tuākana, me tana kori i runga i tōna whakatakaririhanga.
"E kore au e tuku i a koutou kia noho pai, tae atu ki ā koutou huānga, e kore hoki koutou e noho pai, ā, mutu noa! Ka noho ko tēnei tōku tūrangawaewae, ka rongo tonu koutou i tōku ihi, i tōku wehi."
Koinei rā te ōhākī o Tāwhirimātea ki ōna tuākana, i a ia e kake ana ki tana matua i te rangi. Ka noho tonu te kōrero a Tāwhirimātea, ā, tae noa mai ki tēnei rā. I ētahi wā ka noho tonu a ia i runga i ngā kōrero a ōna mātua, kia murua ngā hara a ōna tuākana. Nā, ko ēnei rā, ngā rā paki, e whiti mai hoki te rā, he āio hoki.
Heoi anō, i ētahi wā, kua hoki ake a ia ki te wā i wehea ōna mātua, kua rongo hoki i te mamae, i tō rāua nanao atu ki a rāua anō. I ēnei rā, kua tonoa e ia ōna huānga, arā ngā āwhā me ngā huripari, e korara ai ngā ao a ōna tuākana me ā rātau huānga hoki.