Māui me te rā
I tētahi ahiahi, e whakareri ana a Māui me ōna tuākana i tētahi hāngi, hai hākari mā rātau. Kātahi anō ka mutu ake te whakawera i ngā kōhatu, ka tō te rā, ka pōuri rawa mō rātau. Ka hōhā a Māui ki te kai i ana kai i roto i te pōuri, ka tū a ia ki te mura o te ahi, ka kōrero atu ki tōna iwi.
"Ia rā me tere tonu tātau ki te mahi i ā tātau mahi, ki te rau ake i ā tātau kai i mua i te tōnga o te rā. He aha i pēnei ai tātau? Māku e hopu te rā i mua i tōna maranga ake, māku tonu e tohutohu te rā, kia āta haere noa tōna ara whakawhiti i te rangi!"
Ā, tere tonu tētahi o ngā tuākana rā ki te whakapae atu, i runga i tōna kore whakapono ka oti i a Māui tēnei mahi. "He mahi uaua kē tēnā ki te hopu i te rā, he nui ake i ngā manu kua mau i a koe!"
"Ka rongo koe i tōna wera, i ōna mura, ka mate rā koe," ka kī atu tētahi.
"Te āhua nei kua pakapaka ōna whakaaro i te rā," te kī a tētahi atu, me tā rātau kata anō.
I te wahangūtanga o te iwi, ka tīkina atu e Māui te kauae a tōna tipuna mai i tana tātau, me tana piupiu haere.
"He maha ngā mea i kīia kāore e taea, ēngari i taea e au, te tiki i te ahi mai i a Mahuika, te hopu i te ika nui o te ao, te heke atu ki Rarohenga, me ētahi atu mahi hoki. Mā tēnei kauae tapu, i kohangia mai ki a au e Murirangawhenua, me ō koutou āwhina, ka taea noatia te whakaeke i te rā!"
Whakaae katoa ana te iwi ki ngā mahi a Māui, ki ana mahi mīharo hoki, ka whakaaro ake rātau ki te āwhina i a ia.
I te rā o muri ake, ka haere a Māui me tōna whānau ki te kohi i ngā harakeke katoa, ka whakaakongia e Māui tana whānau ki te whiri taura harakeke, i akona e ia i a ia i Rarohenga. Ka hangaia e rātau he tuamaka, he pāraharaha, ka kōwirihia e rātau ngā taura kia noho porowhita ai ngā taura. Ka pau ngā rā e rima ka reri ngā taura, ka rere ngā karakia a Māui ki runga i ngā taura nei.
"Taura nui, taura roa, taura kaha, taura toa, taura here i a Tamanuiterā, whakamaua kia mau kia ita!"
I waenganui pō ka kawea e Māui me ōna tuākana ngā taura rā ki te rāwhiti ki te wāhi e ara mai ai te rā. Ko ngā rākau me ngā whakatipu ā rātau wāhi huna, kia kore ai rātau e kitea mai e te rā, nā, i runga i te kī a Māui ka whakakīkīhia e rātau ā rātau tahā ki te wai, mō te mahi nei.
I te pō tuangahuru mā rua, ka tae ake a Māui me ōna tuākana ki tētahi rua whānui rawa ake, ā, he whero kē, he wera hoki, me tōna hōhonu anō. Ā, i roto hoki a Tamanuiterā e moe ana. Ka noho wahangū ngā tuākana, me tō rātau mataku hoki ki te oho mai te tipuna rā.
Ka tīmata te tohutohu a Māui i ōna tuākana, ki te hanga whare kia whā, huri noa i te rua hei huna i ngā taura. I mua i ngā whare nei ka whakamahia e rātau ngā wai, ki te whakangāwari i te uku, hei hanga pakitara, hei ārai i a rātau.
"Ka ara ana te upoko me te tinana o Tamanuiterā i te tāwhiti o te taura, ka karanga ake ahau kia kukumehia ngā taura kia kikī tonu," ngā tohutohu a Māui ki ōna tuākana.
Ka puta ake te āwangawanga ki tētahi o ōna tuākana, ka pīrangi a ia ki te oma atu.
"Kei te aha kē tātau?" Tana pātai ki tētahi atu. "Nā te pōrangi tēnei mahi! Ka tahuna rā tātau, ki te oma tātau i nāianei, ākene ka ora tonu tātau!"
E mea ana ngā tuākana e rua rā ki te whakamoho atu, ka kitea rāua e ngā kanohi koi a Māui.
"Ki te oma kōrua i nāianei, ka kitea mai kōrua e te rā i tōna aranga ake i tōna rua. Ko kōrua tonu ngā mea tuatahi ki te mate. E kore a muri e hokia!"
Kāore tonu ngā tuākana i whai wā ki te whakautu atu. Kua oho kē te rā, ā, e ara mai ana i tōna rua. Tere tonu tā rāua hoki atu ki ō rāua whare me te hāpai ake i ngā taura, ka huna ki muri i ngā pakitara uku, e wiriwiri ana i a rāua e tatari ana mō te karanga a Māui.
Ka huna a Māui, me tana whātaretare anō. E āta haere mai ana a Tamanuiterā i tana rua hōhonu, kāore i aro ki te kati i whakataungia mōna. Ka whakawhiti atu tana upoko i te tāwhiti, kātahi anō ōna pakihiwi. Kātahi ka peke atu a Māui, me tana karanga ake ki ōna tuākana.
"Kumea mai ngā taura, i nāianei!"
I te tuatahi he mataku rawa ngā tuakana ki te puta ake. Ka rere anō tana karanga. "Kia tere, i mua i tōna aranga ake, kei tahuna tātau, ā, mate noa!"
I taua wā tonu ka tiro ake te rā ki ngā tahataha o te rua, ka kite i a Māui e tū ana i mua i a ia. Ka pukuriri atu a Tamanuiterā, ka whiua e ia tētahi poro ahi ki a Māui, ka karo a Māui, ka mau tonu ki tana taura, me tana karakia anō.
"Taura nui, taura roa, taura kaha, taura toa, taura here i a Tamanuiterā, whakamaua kia mau kia ita!"
Ka peke mai ngā tuākana rā mai i ā rātau wāhi huna, i mua tonu i te maunutanga mai o Tamanuiterā i te tāwhiti.
"Aaaaiii eee!" Te umere mai o te rā.
Kāore noa iho a Māui i aro ake ki te kaha o te wera, ka hīkoi atu ki te pito tonu o te rua, ka hikina atu tana patu kauwae ki runga ake i tana māhunga, kātahi ka kurua e ia te rā. Ka wheriko ake te uira mai i te mauri o taua patu kauwae rā.
"He aha koutou e pēnei mai ana ki au?" Te tangi a Tamanuiterā.
"Atu i tēnei wā ka tōmuri tō whakawhiti i te rangi, e kore hoki te mana whakatau i te rangi e riro i a koe," te whakahoki a Māui.
E koemi ana a Tamanuiterā, me i kore ka maunu mai ngā taura, ka kurua anō e Māui. Ka pau te hau a Tamanuiterā, ka mutu tana whawhai atu. Ka karanga a Māui ki ōna tuākana kia tukuna ngā taura. Ka āta haere atu a Tamanuiterā ki te rangi, e māuiui ana, e mamae ana hoki.
Ka roa ake ngā rā mō Māui me tana iwi ki te hao ika, ki te rau ake hoki i ngā kai, me te mahi i ngā mahi ā-rangi nei. E kore hoki e puta ake te rangirua mō ngā mahi ka tarea e Māui, nāna i whakarata te rā. Mai i taua rā ki tēnei he āta haere noa te au a Tamanuiterā i te rangi.
Koia nei te pūrākau mō Māui me te rā.