The Unseen
E toro iho ana ngā hihi o te rā ki ngā mānuka e kākahu ana i te wao nui a Tāne. Tokotoru ngā tama e hīkoi ana i te ara oneone whāiti. Ko Boots, ko Fats rātau ko Jimmy-boy, e waha ana i ā rātau tueke moe, ā rātau kōhua, me ā rātau taputapu kai. Ko Tina, te German Shepherd a Fats, tā rātau tūtei, he tere tana hoki atu ki ngā tama, e waiwai ana te arero, e muramura ana hoki ngā kanohi.
I a Jimmy-boy e pana ana i a ia anō ki tētahi wāhi, ka wepua atu te mahunga o Fats e te peka rākau.
“Aī, e Jimmy, kia tūpato! Kei te aha kē koe e hoa!”
Kua taka kē ngā tueke, ā, kua oma atu a Jimmy-boy rāua ko Boots ki te kauri e whātoro ake ana ki a Ranginui.
Ka whawhai mamau te tokotoru ko Tina hoki i waenga i te otaota tāroaroa, kātahi ka whakatū i ngā tēneti.
“Ka mau kē te wehi, nē rā e hoa?” Te kī a Fats i a ia e whirinaki ana i te kauri, e paopao tonu ōna hoa i ngā titi ki te whenua.
“Ko tātau ngā ‘Survivors’ i runga i te pouaka whakaata, kua mahue ki tētahi motu koraha.” E kōrero tonu ana a Fats.
Ka mutu a Jimmy-boy i ana mahi ka tiro atu ki a Fats.
“Ko te mea kē, he tēneti, he pēke moe, he rama, me ngā tini kai mai i te pātaka kai a tō māmā, ā tātau.”
Ka mura mai ngā kanohi a Fats.
“Āe tika, he kai. Ki tāku mōhio ko te wā kai!”
Ka ngōki haere atu a Fats, e hongihongi ana, e ngengere ana pēnei i te pea matekai. I tana taenga tata ka peke atu a Boots ki runga i tana tuara.
“Kaua e kaikā Pāpā pea, kia mōhio tonu koe, kei te hiakai anō a Pēpē pea!”
He whawhai mamau kei te haere, ka poua mai rāua tahi e Jimmy-boy.
I taua ahiahi tonu e takoto ana te tokotoru nei i runga i ō rātau puku, e kai tahi ana i tētahi tini huarākau, e toro ana ō rātau mahunga i te tatau tapatoru o tā rātau tēneti. Ko Tina tērā e takaokeoke mai ana i runga i tana tuarā, e rapirapi ana i tana waewae.
Ka huri te ahiahi ki te pō, e kanikani mai ana ngā maru i te tuanui o te tēneti, ā, e kōrero ana ngā tama nei, e katakata ana hoki i roto i ā rātau pēke moe.
“E kī rā, kāore koe i te mataku i te kēhua?” Ka ara ake a Boots, ka tohua te rama ki a Jimmy-boy.
“Nā runga i te pono e hoa, kāre kē koe i haere ki te karakia?”
“Pērā i te wairua tapu!” Ka raua e Fats tōna rua hēneti.
“He aha?” Kua tino rangirua nei a Boots.
“Ko te kēhua pūareare tēna.” Ka putē mai ngā kanohi a Fats me te toro o ana ringa i mua o Boots, ānō nei i te tuku karakia.
“Mēnā kāre koe e whakapono ana ki te kēhua, me pēhea hoki tō kite i a ia?” Te kōrero whakapono a Jimmy-boy.
Kāore tonu a Boots i pono. “Kaua e pātaihia te hunga kore e kitea!”
Ka rere te ringa o Fats ki te korokoro a Boots, “Ngā ringa poroiwi o te kore e kitea e tārona ana i tō kakī.”
Nā te auau a Tina i warea te whawhai hīanga. Tere kōiri ki rō peke moe te tokotoru, ā, i neke ki muri rawa o te tēneti. Kei waho tonu a Tina e pahupahu ana e takaoriori ana i te mere o waho. Ka kākati te ringa o Boots i te rama, e haeata mai ana i te pouri. Kātahi ka ngū mai a Tina, pērā anō te tokotoru. Ai ē! Ko te hihī, ko te ngawī, ka auau, ka pahupahu mai anō a Tina.
“He aha hoki tērā?” Ka whakatata atu a Fats ki a Boots.
Ka pātata te tangi rā. Ka tarapeke mai a Tina i te mere, kātahi ka tioro te tokotoru ka tere huna i roto i ā rātau pēke moe, kua kumea ake ki runga i ō rātau taringa.
Ka kaha ake te ngawī, nā Fats te rama i kapo atu mai i a Boots, i a Boots te naihi pata, ā, he tini pēke pīni tā Jimmy-boy. Ka noho pipiri rawa te tokotoru, e kanakana ana ō rātau karu, e areare ana ngā taringa, mataku katoa.
“He aha tērā? He mea kei waho rā.” Ka tiro atu a Boots ki a Jimmy-boy.
Ka putē atu ngā kanohi o Fats ki ngā tokorua rā, “Ko Dracula kē. Pono! He rite ki te kiriata.”
“Hoihoi tō waha Fats, ehara i a Dracula!” Te āhua nei kāore tonu a Jimmy-boy i pono ki a ia anō.
Ka heke te ngawī ki te ngengere. I waho a Tina, me te mea rā e whawhai ana. Ka peke tētahi mea ki runga i te tēneti, ka whai mai ko Tina, ka turaki whakaroto te tēneti. Ka tioro anō ngā waha o te tokotoru rā.
Kaha tonu te hāparangi o ngā tama rā, kātahi ka ngū katoa te pō. Ka takoto noa iho rātau, kua mataku rawa rātau ki te neke.
Nāwai rā, ka āta whakatikahia e rātau tā rātau tēneti, ka āta puta rātau i te tēneti. Ka tirotiro haere a Fats i te wāhi e noho nei rātau. Auē! He aha ērā rama e tīpoka ana i te pouri. Ka tioro, ka umere anō te tokotoru. Engari mō tēnā, ko ngā karu o Tina noa iho. Ka karangahia atu e Fats a Tina.
“Ka pai girl, ko koe rā kei te manaaki i a mātau nē rā.”
“E aha ana koe, nāna i tata mate ai tātau!” i te wiriwiri tonu a Boots.
“Kāo, ehara koia.”
“He huruhuru kei tana waha, ākene pea he paihamu kē.” Te aruaru mai a Jimmy-boy.
Ka tata atu a Fats. “Ko tētahi pea o ngā tamariki a Dracula!”
E hoki haere ana a Boots ki roto i te tēneti, e whai haere ana a Fats i a ia.
Ka noho ko Jimmy-boy anake i te tatau o te tēneti. “Hei aha tāu. He heihei noa iho kōrua!”
Kikī ana te pupuri o Boots i tana peke moe. “Mēnā kāre koe i te mataku, māhau hei tirotiro haere!”
Ka rongohia e hoihoi mai ana a waho. Ka kumea mai e Jimmy-boy te kōtui o te tēneti.
“Pai noa.”
Ka pupurihia e Fats te rama, me te whakamōhio atu ki ōna hoa nā tōna matua kē te rama. Ka tangi mamao mai te ruru. Ka noho ngū te tokotoru, e whakarongo ana ki ngā iere o te pō. E rua hāora i muri mai kātahi anō ka moe rātau.
I taua ata ka kitea ngā huruhuru e korara ana i tō rātau hopuni, engari kāre i kitea te paihamu.
“Ākene, i haria e Tina ki wāhi kē.” Ka whakaae rātau ki te kī a Fats, me te mea, kāore tonu rātau i hiahia kia kitea te mea rā.
“Ākene ko tētahi o aua kēhua e kore nei koe e mataku.” Ka kata a Boots i a ia e hoki haere ana i runga i te huarahi.
“Kāore noa iho au i te mataku.” Te kī a Jimmy-boy, ka kaha ake te kata a Boots.
“Hei aha kē te tini pēke pīni?” Kua kata anō a Fats.
Kāore he aha ki a Jimmy-boy, ka kata anō a ia. “Pēhea kē te rama Fats …ā, nā toku pāpā kē… koinā te take māku e pupuri. Me tō naihi pata e Boots, i te hiahia koe ki te pata i tō hanawiti heihei? Haha!”
I ngā tokotoru e hoki haere ana, ka katakata, ka whakaputa kōrero mō ngā mahi o taua pō. Ko wai i mataku, ko wai kāre i mataku, me ō rātau whakaaro mēnā ka tau mai anō taua āhuatanga. Kotahi noa iho te mea i whakaae katoa rātau i tō rātau taenga atu ki te kāinga. Kore rawa tētahi atu e mōhio i te tino mataku katoa rātau i taua pō rā, i te haerenga mai o te kēhua huruhuru, kāore i kitea.